कुर्ल्यात बेस्ट बसखाली लोकांना चिरडणारा चालक अटकेत

Raju tapal December 10, 2024 34

कुर्ल्यात बेस्ट बसखाली लोकांना चिरडणारा चालक अटकेत

मुंबईतील कुर्ला एलबीएस रोडवर भीषण अपघाताची घटना घडली आहे. भरधाव बेस्ट बसने बाजारपेठेत घुसून अनेकांना उडवल्याने गंभीर परिस्थिती निर्माण झाली.

या अपघातात आतापर्यंत तिघांचा मृत्यू झाला, तर 20 लोक गंभीर जखमी झाल्याची माहिती आहे.

अपघाताच्या वेळी बसने बाजारपेठेतील अनेक वाहनांना धडक दिली. या घटनेत काही रिक्षांचा चक्काचूर झाला. या बसचा ड्रायव्हर संजय मोरे याला अटक करण्यात आलेली आहे. 105,108,118 कलमा अंतर्गत ड्रायव्हरवर गुन्हा दाखल करण्यात आलेला आहे अशी माहिती डीसीपी गणेश गावडे यांनी दिली आहे.

या घटनेनंतर परिसरात मोठी गर्दी जमली. पोलिसांनी घटनास्थळ गाठून मदतकार्य सुरू केले.

जखमींना तातडीने जवळच असलेल्या भाभा रुग्णालयात हलवण्यात आले आहे. या प्रकरणाचा तपास कुर्ला पोलीस करत असून चालकाला पोलिसांनी ताब्यात घेतले आहे.

या घटनेमुळे परिसरात मोठी खळबळ उडाली असून नागरिकांकडून हळहळ व्यक्त केली जात आहे.

या अपघातावर माध्यमांशी बोलताना स्थानिक आमदार मंगेश कुडाळकर म्हणाले, "कुर्ला स्टेशन येथून बेस्टची इलेक्ट्रिक बस निघाली. थोड्या अंतरावर आल्यावर चालकाचा बसवरील ताबा सुटला आणि रस्त्यावरील नागरिक, गाड्या यांना उडवत बस डॉ. बाबासाहेब आंबेडकर नगर येथे आली. या अपघातात अनेकांचा मृत्यू झाला आहे."

"बसच्या चालकाला पोलिसांनी ताब्यात घेतलं आहे. त्याच्यावर सक्त कारवाई करण्यात येणार आहे. त्याआधी अपघातात जखमींना वाचवणं आपलं कर्तव्य आहे. त्यासाठी आम्ही सर्वोतपरी प्रयत्न करत आहोत."

'अपघातात तीन पोलीस जखमी'

"या अपघातात तीन पोलीसही जखमी झाले आहेत. ही अत्यंत गंभीर दुर्घटना आहे. आम्ही जखमींना सर्वोतपरी मदत करू. त्यांना वाचवणं हेच पहिलं काम आम्ही करू," असंही आमदार कुडाळकर यांनी नमूद केलं.

Share This