अंबिवली लाईटहाऊस,केडीएमसी येथे आंतरराष्ट्रीय महिला दिन उत्साहात साजरा

Raju tapal March 09, 2026 77

कल्याण :- ८ मार्च आंतरराष्ट्रीय महिला दिनाच्या निमित्ताने कल्याण-डोंबिवली महानगरपालिका आणि लाइटहाउस कम्युनिटीज फाउंडेशन यांच्या संयुक्त विद्यमाने अंबिवली लाईटहाऊस स्किल डेव्हलपमेंट सेंटर येथे विशेष कार्यक्रमाचे आयोजन करण्यात आले. स्थानिक समुदायातील महिलांच्या कर्तृत्वाचा सन्मान करणे तसेच कौशल्य विकास व उपजीविकेच्या संधींना प्रोत्साहन देणे हा या कार्यक्रमाचा उद्देश होता. या कार्यक्रमालाहर्षाली विजय चौधरी-थविल (महापौर) आणि अभिनव गोयल(आयुक्त,केडीएमसी) यांची प्रमुख उपस्थिती लाभली. याशिवाय महानगरपालिकेचे वरिष्ठ अधिकारी आणि स्थानिक नगरसेवक बंदेश जाधव व नगरसेविका वनिता दुर्योधन पाटील तसेच स्थानिक पदाधिकारी व ग्रामस्थ मंडळी देखील उपस्थित होते. कार्यक्रमाची सुरुवात दीपप्रज्वलनाने आणि मान्यवरांच्या सत्काराने करण्यात आली. लाईटहाऊस केंद्रातील युवक-युवतींनी या कार्यक्रमात सहभागी होत लाईटहाऊस उपक्रमामुळे आपले जीवन कसे बदलले याच्या प्रेरणादायी कथा सादर केल्या. या प्रसंगी कौशल्य प्रशिक्षण यशस्वीपणे पूर्ण केलेल्या महिलांना प्रमाणपत्रांचे वितरण करण्यात आले. या प्रशिक्षणामुळे महिलांना रोजगार तसेच उद्योजकतेच्या संधी उपलब्ध होत आहेत. केडीएमसी मधील लाईटहाऊस उपक्रमांतर्गत युवकांना करिअर मार्गदर्शन, जीवनकौशल्ये तसेच कौशल्य प्रशिक्षण आणि रोजगाराच्या संधी उपलब्ध करून दिल्या जातात. केडीएमसी परिसरातील पहिले लाईटहाऊस केंद्र मे २०२१ मध्ये डोंबिवली येथे सुरू झाले, तर मार्च २०२३ मध्ये अंबिवली येथे दुसरे लाईटहाऊस केंद्र सुरू करण्यात आले. अंबिवली लाईटहाऊस केंद्रात विशेषतः महिलांचा सहभाग मोठ्या प्रमाणात आहे. २००० युवकांनी फाउंडेशन कोर्स पूर्ण केला असून त्यापैकी १३०० महिला आहेत, तर ५६० महिलांना या उपक्रमाद्वारे रोजगार मिळाला आहे. अंबिवली लाईटहाऊस हे २७०० चौरस फूट क्षेत्रफळाचे शिक्षण केंद्र असून पूर्वी वापरात नसलेल्या मासळी बाजाराच्या जागेचे रूपांतर करून ते युवकांसाठी शिकण्याचे आणि प्रगतीचे सशक्त केंद्र बनविण्यात आले आहे. लाईटहाऊस उपक्रमांतर्गत ग्राफिक डिझाइन, वेब डेव्हलपमेंट, डिजिटल मार्केटिंग आणि ऑफिस अॅडमिनिस्ट्रेशन यांसारख्या विविध क्षेत्रांमध्ये प्रशिक्षण दिले जाते, ज्यामुळे युवकांना शाश्वत करिअर घडवण्याची संधी मिळते. यावेळी बोलताना महापौर अॅड. हर्षाली विजय चौधरी-थविल म्हणाल्या, "आंतरराष्ट्रीय महिला दिनाच्या निमित्ताने इतक्या मोठ्या संख्येने तरुणी कौशल्य विकासाद्वारे आपले करिअर घडवण्यासाठी पुढे येताना पाहणे अत्यंत आनंददायी आहे. लाईटहाऊससारख्या उपक्रमांमुळे महिलांना आर्थिकदृष्ट्या स्वावलंबी होण्याची आणि समाजात आत्मविश्वासाने योगदान देण्याची संधी मिळत आहे." तर आयुक्त अभिनव गोयल (आयएएस) म्हणाले,"डोंबिवली आणि अंबिवली येथील लाईटहाऊस केंद्रे युवकांना रोजगारासाठी आवश्यक कौशल्ये आणि आत्मविश्वास देत आहेत. विशेषतः अनेक तरुणी या उपक्रमाचा लाभ घेत असून आपल्या कुटुंबातील पहिल्या कमावत्या ठरत आहेत, ही अतिशय आनंदाची बाब आहे." कार्यक्रमाच्या शेवटी महिलांनी तयार केलेल्या उत्पादनांचे आणि कामांचे प्रदर्शन आयोजित करण्यात आले होते. यामुळे उपस्थितांना लाभार्थींशी संवाद साधण्याची आणि त्यांच्या उद्योजकीय उपक्रमांना प्रोत्साहन देण्याची संधी मिळाली. केडीएमसी मधील लाईटहाऊस उपक्रमाला वेल्स फार्गो यांचे सहकार्य लाभले असून त्याची अंमलबजावणी लाइटहाउस कम्युनिटीज फाउंडेशन यांच्या भागीदारीत केली जात आहे. संपूर्ण भारतात लाईटहाऊस उपक्रमाची ५० केंद्रे कार्यरत असून ६२,००० युवकांनी उपजीविका कार्यक्रमांमध्ये सहभाग घेतला आहे आणि ४३,००० हून अधिक युवकांना रोजगार मिळाला आहे. या उपक्रमाद्वारे कल्याण-डोंबिवली परिसरातील अधिकाधिक युवकांना करिअर मार्गदर्शन आणि कौशल्य विकासाच्या संधी उपलब्ध करून देण्याचा प्रयत्न सुरू आहे.